بعد حوار ميدو مع عمرو اديب انقسم الزمالكوية على موقفه من السيسي و الاخوان و القضايا المتعلقة بالسياسة في مصر ( لك ان تتخيل ان الزمالكوية انقسمو علشان - العالمي - ميدو قرر يدعم فصيل بعينه .. تعالى بقى نفرد الموضوع و نرد على المبرارتية الي للاسف المرة دي زمالكوية زي بس الحق احق ان يتبع :
قالو : ميدو لو كان قال انه ضد السيسي كنا فرحنا و قعدنا نمجد فيه ( الجملة الي كله حفظها وكتبها كوبي & بست ) اه والله حتى منغير ميفهو
الرد : اولا كدة حضرتكو بتطبقو المثل المصري الشهير " العاهرة تبليك و الي فيها تجيبو فيك " و هي في المثل مش عاهرة طبعا هي بالعامية .. ابو تريكة لما اتكلم في السياسة و دعم فصيل بعينه كلنا هاجمناه !! بس للاسف كان في ناس بتهاجمه علشان دة ابو تريكة اللاعب الاحمر مش علشان هو بيتكلم في السياسة و بيحشد الرأي العام لفصيل معين مستغل شهرته في قلوب كتير من المصرين !! لو تلاحظو تعليقتنا على ابو تريكة ساعة الاخوان كان كلها " ياعم متخليك في الكورة و انت مالك و انت هتعملي فيها خبير استراتيجي ", لكن لما قلنا الكلام دة على ميدو يبقى ازاااااي !؟ انت مش زملكاوي ولا اية ؟؟
قالو : ميدو مواطن مصري مكفول له حرية الرأي !
الرد : الناس تقريبا مش قادرة تميز او قاصدة انها تغض الطرف ما بين المواطن المصري الي رأيه بيمثل نفسه و بين المواطن المصري الي بيمثل عدد كبير من الناس زي رئيس او مدرب او لاعب في نادي جماهيري كبير زي الاهلي و الزمالك , و بعدين مسمعتش صوت الناس دي لما الهام شاهين اتكلمت في السياسة هي و سماح انور و غيرهم ؛ بالعكس كانو بيشتموهم و يجبولهم افلامهم المسفة !! بس برضو احنا بنحفظ قشور الحريات و نعد نرددها عن ظهر قلب .. رأيه الشخصي على عيني و راسي يطلع يقوله بعيد عن منصبة الاداري او الجماهيري ؛ الراجل قاعد في البرنامج بصفته المدير الفني لنادي الزمالك ( مش بصفته احد شباب الثورة مثلا ولا احد اعضاء حملة كمل جميلك ) يعني زمالك , يعني كورة ؛ يعني اية الي يدخلك في صراع بيقسم مبيوحدش و تقسم الجمهور الي فيه اكتر من فصيل ! لية !!
قالو : من حقه يتكلم في السياسة و يظهر موقفة السياسي !
الرد : همشي وراك للاخر و هقلك ماشي حاضر علشان انت مش حافظ غير البند دة من الحريات . يتفضل يقول رأيه و احنا كمان هنقول رأينا في زيه زي احمد موسى و سبايدر و اي حد تاني بيتكلم في السياسة !! مش هو رضي انه يتكلم زيهم يبقى من حقنا نتكلم عليه زي مبنتكلم عليهم .. او على العكس برضو ( علشان الي بيرددو لو كان يسقط حكم العسكر كان بقى حلو ) لو طلع ضد بتوع السيسي كان بتوع السيسي حقهم يقولو طابور خامس و ممول و عضو في خلية اخوانية نائمة .. مهي دي السياسة يا باشا !! بتفرق مبتجمعش و احنا مش ناقصين .. و بعدين رضيت تتكلم في السياسة فاستحمل تبعاتها
اخيرا بقى : فقه الاولويات ؛
مبدأيا كدة مفيش حاجة في الدنيا مقدمة على الوطن لان الوطن حبه من حب الدين , فمينفعش اقول الزمالك اولا ( و انا اسف اني كنت بقولها قبل 25 يناير ) في وطن بيضم الجميع دة له الاولوية القصوى و بعديه ابتدي فكر في انتمائك الحزبي و انتمائك الكروي و انتمائك الجغرافي و كل دول بتتبنى فيهم وجهة نظر تخدم بيها الوطن من منظورك .. و للاسف دة الي احنا اشرنا اليه في اول نقطة ؛ فكرة تجيش الرأي العام مستغل منصبك او مكانتك عند جموع من المصرين الي اكتسبتها مش بسبب السياسة ولا الحريات بل بالكورة !! كتير من الناس هتتأثر بكلامك لحبهم الشديد و تعصبهم المفرط للنادي .. و علشان كدة دايما الاجهزة الامنية و التنظيمات الحزبية الكبيرة ( زي امن الدولة و تنظيم الاخوان ) بيبقى في اول تطلعاتهم هو استقطاب المشاهير اعلاميا و جماهيريا علشان قدرتهم على التأثير على قطاع عريض من الناس ..
الي مزعلنى اننا بعد 3 سنين من الثورة ؛ متعلمناش اي حاجة ! لسه بنقيس السياسة و الدم باهلي و زمالك , لسة الكورة بتنسي الناس حاجات كتير , لسة النظام بيستخدم الكورة كاساتر يطبخ تحتيه اقذر الالعاب السياسية و لسة الناس بتلبسها !!
الي مزعلني جو المزايدات الرخيص الي بمجرد ما بتتبنى موقف ضد ناس معينه محسوبة بشكل او بأخر عليك ؛ يبتدو يقولو عنك انك مش زمالكاوي ( و هم لحد الوقتى ميعرفوش طريق الاستاد ) بس مش مهم ؛زي ما في حزب كنبة في البلد في حزب كنبة في كل نادي و فصيل
اهم سطر في التدوينة :
انا كنت متأكد ان ميدو هيعتذر عن الي هو قاله بحكم معرفتنا عنه و انه زكي مش غبي و مش هيستدرج للفخ دة .. تحية و شكر مني لميدو الي اتمنى نص المسؤلين بس يبقو زيه و يسمعو للناس و يحاولو يجمعو ميفرقوش .. يركزو في مواقعهم الادارية .. شكرا يابن النادي و ابن المدرج انك سمعت صوتنا و موقف تحترم عليه و هنقلك اسفين لو كان هجومنا عليك شديد بس كان لازم لاننا عارفين مصلحة النادي و مصلحتك كويس !!
