لية هنزل 27 مايو ؟ رؤية شخصية

ثورة الغضب الثانية او جمعة الفساد السياسية او جمعة التطهير او جمعة تصحيح مسار الثورة .. اطلقو كما شئتم من اسماء ولكن لابد ان نجتمع كلنا على امر ثابت لا يتحمل النقاش و لا تغفله اعيننا هو : لم تكتمل ثورتنا بعد و لم تتحقق مطالبنا !

مبدأيا دي رؤية شخصية ملهاش اي علاقة ببيان مطالب ثورة الغضب الثانية و انا متفق بالكامل مع كل المطالب المذكورة في البيان

لية انا هنزل يوم 27 مايــــــو ؟؟؟؟؟!!!!

عندي اسباب كتير احب اسردها بعضها - فئوي - لو تحبو تسموها كدة , بعضها نفسي , بعضها حقائق من منظوري الشخصي .. المهم ان عندي اسباب كتير :

1. انا شخصبا كنت متوقع ان بعد رحيل الرئيس اول حاجة هنعملها هيا حكومة انتقالية بتستمد شرعيتها من الميدان و دة حصل فعلا بس للأسف في مناصب وزارية فضلت لوزراء من النظام السابق و وزراء غير كفئ لأدارة المرحلة دي
2. الدستور .. كنت متوقع اننا هنعمل دستور بيعبر عن كل فصيل في الشارع المصري و بيحكم الرئيس القادم و بيقنن سلطاته بس حصل الي حصل و لجأنا للصندوق و تم الموافقة على 6 مبادئ دستورية اتحولو ل 63 بند دستوري .. وقالولنا الدستور الجديد هيتعمل بمعرفة مجلس الشعب القادم - مع التحفظ على مجلس الشعب القادم - المهم سكتنا و قلنا دي الديموقراطية و شكرا .. رغم ان فيه حاجة اسمها ثورة عملها 8 مليون مواطن .. و لم تفرض مطالبها على الساحة و دة انا مشفتوش قبل كدة بس مش دي المشكلة
3. حكومة غير متحكمة في الوضع الامنى في البلاد و بنعاني من انفلات امنى رهيب سواء كان عجز فعلى او متعمد
4. الاقتصاد بيشهد حالة من حالات التخبط الشديد و هما مش فالحين غير في كلمة واحد " عجلة الانتاج " الي بقى بتعطلهلنا المظاهرات - مش عارف ازاي - و بتعطلها الاعتصمات الي بيقولو عليها فئوية
5. قانون الطوارئ متلغاش . مع ان دة كان مطلب اساسي
6. مفيش حد اقصى و حد ادنى من الاجور لك ان تتخيل ان باب الاجور في الميزانية 80% منه رايح لي 20 % بس من موظفي القطاع العام و 20% بيروح لل 80 % و سلملي على العدالة الاجتماعية - بيتهيئلي دي مش محتاجه كيميا علشات تتعمل - و دة لازم يتنفذ فوراااا و لازم نحس ان مرتباتنا زاديت بنسبة توفرلنا على الاقل اساسيات الحياة
7. قانون تجريم التظاهر و الاعتصام . مخالفة صارخة لكل دساتير العالم و كل المبادئ الانسانية
8. استخام مفرط للقوة في بعض الاحيان من قبل السلطات
9. ولادنا بيتحكمو عسكري و الي سرقونا و نهبونا و قتلونا بيتحكمو مدني في تباطــــــــــــــــئ شديد
10. مشفتش ولا مليم من الفلوس المسروقة
11. مفيش اي مشاركة لأتخاذ كل القوانين دي . بردو القوانين بتتاخد من جهة واحدة وبتفرض علينا و بتتطبق ! على طريقة و ان كان عجبكم
12. معلش و اعذروني في البوينت دة ممكن تسموه جحود ممكن تسمه تعالي سموه زي متسموه بس انا متأكد ان ناس كتير هتفهمة زي منا عايز , الي عمل الثورة المجيدة دي شوية شباب من الفاس بوك و نشطاء من على التويتر كفرو من حال البلد و القمع و الفساد الصارخ الي فيها , مع احترامي لكل الفصائل السياسية ! كنتو فين ؟؟ و بالذات اخوانا الاخوان الي دلوقتي نطو على الثورة كأنها طلعت من مكتب الارشاد !و مع احترامي لأخونا السلفين - على فكرة كلنا سلفين في المعنى اللغوي - حرمتو الخروج على الحاكم و طلبتو مننا ندعي للمسؤلين بتوعنا بالهداية ! و دلوقتي !!!!! صوتكو بقى قد كدة ! و كل قديتكم الشاغلة هيا اقباط مصر و منفضين تمام التنفيض لأحوال البلد ! و طبعا معاكم الاحزاب الكرتونية الي موجودة و اولها الوفد الي زهقنا خطبات اي كلام ... مع كل الاحترام ... هذة ليست ثورتكم بل ثورة شباب مصر الاحرار .. نزلو بدون اي ايدلوجيات توجهم كان محركهم الاساسي هو , حال البلد الي يصعب على الكافر .. لماذا سرقتم ثورتنا الطاهرة ؟ شعب مصر العظيم .. اولادكم عملو ثورة تدرس بالخارج .. و لكن عفوا يا اجدادنا و ابائنا . لقد هدمتم حلمنا بداعي الاسقراااااااار الغير موجود اصلا لا في عهد مبارك و لا بعدة , دائما ما قلتم لنا " كفاية بقى , انتو مشبعتوش , هتخربوهااا , هوا احنا كنا نحلم بروبع الي حصل " الي نزل الميادين و الشوراع لا يتجاوز ال 10 او 15 مليون من اصل 85 مليون ! سؤال ؟؟؟!! لم لم تتركونا نكمل طريقنا الي آخره ؟ هذا ما يسمى ديمواقراطية الاغلبية ! بل ظلم ديموقراطية الاغلبية
13. بمناسبة الكلام عن الاخوان المسلمين .. احترم شباب الاخوان جدا .. و اطالبهم بالثورة على مجلس العواجيز - شورى الاخوان - البالي الذي لا يفكر الا في المناصب و الكراسي لمجرد التحكم . و اشكرهم او بعضهم على المشاركة في 25 يناير من اولها و في 27 مايو
14. الثورة تفرض مطالبهــــــــــا و لا تستجدي احد
15. عفوا مجلسنا العسكري الموقر - لقد شاهدت 30 عام من الفساد و لم تحرك ساكنا - الثورة هيا ثورة مصرية شبابيه شعبية خالصة و ناقية . و شكرا على مجهودكم الرائع على " الوقوف بجانب ثورتنا " و لكن بأعترافك انــــت فهذة هيا ثورتنا
16. تعدد المشاكل الطائفية في الاونه الاخيرة
17. العادااااااااااالة , شهدائنا يطالبون العدالة .. انا مش هذكر كل الجمعات الي نزلنها نطالب فيها بالعدالة من الي افسدو مصر 30 سنة من الي قتلو المتظاهرين - طفح الكيل - مش كل جمعة ننزلها حد ينقطنا بتنفيذ 1\100 من مطالبنا .. لا خلاص زهقنا عايزين كل حقوقنا و مش هنرضى بالفتات تاني
18. غموض غريب و مريب حول كل رموز النظام السابق الي في السجون
19. الاعلام المصري لسة زي مهوا
20. هناك بعض قيادات النظام السابق بيمارسو عملهم عادي جدااا و لا كأن في ثورة حصلت زي ظباط امن الدوله الي عذبو الناس و قتلوهم و زي ظباط و أمناء قتلو المتظاهرين و معرفين بالاسم , كل الي حصلهم انهم اتنقلو بس من مكان لأخر و عميد كلية اعلام الي بعد مزاد علية الضغط ادولو اجازة شوية - علشان يريح اعصابه-
21. المعتقلين السياسين زادو منقصووووووووش
22. زيادة البلطجة بصورة اصبحت لا تطاق ! مع الرغم ان القانون بيطبق حلو اوي ضد المتظاهرين و اصحاب الرأي !!!
23. استخدام فزاعة الاقتصاد و الامن ! طب انا مش عارف امال فية وزراء لية ؟؟؟ و لا هما وظيفتهم انهم يخوفونا مش يحلو مشاكلنا ؟؟
24. قيادات الاخوان لهجتهم في الاعلام بالظبط هيا لهجة الحزب الوطني السابق .. بيتكلمو عن 30 35 % من المجلس على اساس انهم عرفو النتيجة من الكنتترول ! يا مجلس شورى الجماعة الموقر عيزنها " مشااااااااااركة لا مغااااااااالبة " و لكم في الحزب الوطنى عبرة و عظة
25. بيان القوانين المنظمة للحياة السياسية فاتر و محدش فاهم منه حاجة ! و لا احنا عارفين فية قائمة نسبية ولا لأ . و التصويت بالرقم القومي و لا لأ و موضوع اصوات المصرين الي بالخارج الي انتو مش عايزنها يصوتو مش عارف لية ! و لا كأنهم مصرين بس نوص و نوص
26. معلومة عرفتها من ابراهيم عيسى .. علشان تعمل حزب الوقتي عايزلك مش اقل من 900 الي مليون جنية علشان 5000 مؤسس و 5000 توكيل في الشهر العقاري و نشر اسمهم في صحيفتين رسميتين على الاقل و دة يعني 3 صفحات جرنال كاملين يعني فعلا تخشلها في سكة مليون ! العجب ان الاحزاب الي اتأسست فعلا و اتوافق عليها حزب الاخوان - الحرية و العادة- , حزب النور بتاع الجماعة الاسلامية , حزب بتاع نجيب سويرس - الي انا مش فاكر اسمه - !!!! - مع عدم اعتراضي عليهم كأحزاب - بس هوا مفيش فلوس الا مع التيار الاسلامي و مع نجيب سويرس
27. حظر التجوال الي ملوش اي معنى دلوقتي غير انه حجة لفض بعض الاعتصامات - مع وجود اعتصامات و مظاهرات بتتفض قبل الحظر ب 5 ساعات - او من الاخر تلكيكة لأعتقال احد الاطراف , الحظر لايطبق بالمرة و ملوش اي لازمة لان مش هما ال 3 سعات دول الي بتحصل فيهم كل الكوارث الي في مصر
28. من الاخر انا شايف ان ثورتنا اتسرقت و اتقسمت من بعض التيارات السياسية و الاحزاب الكارتونية بالفعل ... بيتهيئلي ! ان من حقى استرد ثورتي

بشرى ساره :

انا شيفها حاجة كويسة و بشرة خير " ان نفس التيارات الي شاركت في 25 يناير من اولها هتشارك في جمعة 27 مايو - 6 ابريل , دعم البرادعي , شباب الوفد و التجمع و حركة كفاية و طبعا الناشطين و المدونين مع زيادة ائتلاف شباب الثورة ... و هما هما الي عارضو يوم 25 يناير و بعد كدة نطو عليه جماعة الاخوان المسلمين - بأستثناء بعض شباب الجماعة - و التيار السلفي الي كالعادة حرم الخروج يوم 27 مايو زي محرم 25 يناير " شخصيااااا انا شايف ان التاريخ بيعيد نفسه و مستبشر خير .. رغم ان المعركة هتبقى اشرس لأن الاخوان بالذات معارضة اليوم بثقلها و ربنا يستر منهم

و علشان كدة انا هنزل يوم 27 مايو . نازل تاني التحرير علشان محستش بالتغيير

كل الاسباب السابقة هيا رؤية شخصية من نظرتي المتواضعة للموقف الحالي في بلادنا