دولة تقتل شبابها

تعالو اكلمكو عن اجهزة الدولة الي بتحارب شوية شباب صغير : 

1- الداخلية الي مبتبخلش على الشباب باي رصاص في القلب الصراحة و لو اعتقلتهم بيبقى الضرب و حوادث هتك العرض في المعتقلات عادة روتينية يومية و برضو نشكر المباحث و مباحث الامن الوطني بالتحديد لجهدها المضاعف في تلفيق القضايا للشباب

2- الجيش الي انضم للداخلية و شاركها كل جرائمها و فوق كل دة و دة بيدير البلد و بيحط ايده على اقتصادها و بيثبت جزورة اكتر في الحياة السياسية و الاقتصادية 

3- القضاء الشامخ الي يبقى قدامة الواد برئ و الورق بيقول انه برئ و القاضي متاكد انه برئ و الواد طالع دين امه ضرب و يحكم عليه حكم يضيع بيه مستقبله و حياته , لا و الجديد انه بقى بيقبل باجرائات غير قانونية اصلاااا لمجرد انه يقدر يفشخ العيال دي باي شكل بتوصيات طبعا من العسكر و الداخلية 

4 - الاعلام المصري كله بلا استثناء الا من رحم ربي من مزيع او اتنين بيرسخوووو لقواعد الديكتاتورية و القمع و بيقنعو الناس بان القضاء شامخ و عادل و ان الداخلية بتحميهم مش بتفشخ ولادهم ولا تقتلهم و كل الي بيعمله الجيش دة في صالح البلد ,, و ان الولاد دول اصلاااا ارهابين !! اه و الله بتقنع الناس ان شوية الولاد الدكاترة و المهندسين دول اراهابين ..

انت عارف احنا بنحارب في كام جبهة !! انت عارف كم الجرائم الي ضد الانسانية الي بتحصل فينا عاملة ازاي !! انت عارف حجم الدولة العميقة الي احنا وقفنا قدامها عامل ازاي ؟؟! 

المجد للاحرار الثابتين على الافكار # مكملين

فيلم الخروف و الفِل و الثوري

ياريت تركززز اوووي في الفيلم الي هتشوفه دلوقتى علشان تفهم الي حصل و الي هيحصل قبل ما الشاشة تسود :
Scene 1
الاخوان اه فيهم الي مسك السلاح و قتل العشرات من الداخلية بس الهدف الوضيع مكنش انه يموت الداخلية مثلااا عشان فاسدين ولا حاجة لا ! ابسولوووتلي : الهدف كان ان يموت من الاخوان الالاف اغلبهم من الابرياء او من الي كانو فعلا سلمين
scene 2
الاخوان عولو على عامل الوقت و ذاكرة الاسماك للشعب المصري بعد ما شال السلاح و بسببه ارتكبت مجزرة راح ضحيتها الاف رجعو تاني يهتفو سلمية !! و يعمل مسيرات سلمية ! و المسيرات تَتضرب !! و مع الوقت هيبتدي يتعاطف معاه الشعب في شهر في سنه في اكتر بس هو حرييييييييف اوي في لعب دور الضحية و المستضعف و مبيملش من لعب الدور دة و دي الحاجة الوحيدة الي هم فعلا شاطرين فيها
scene 3
حالة الاستقطاب الي فيها البلد يا مع النظام الحالي ( ان يطلق يده في البلاد ) او بمعنى اصح تمضيله علي بياض , يا مع النظام السابق و بتطالب بعودة المخلوع .. حالة الاستقطاب ظاهرة جداااااااا في الاعلام ,, اعلام بيعرص لقضية و اعلام بيعرص لقضية اخرى بلا اي حيادية او منطقة محايدة او حقايق ؛ الحالة دي هتثير جهاز انذار عند الثوار او الحقوقين او النشطاء او الثوار الغير منتمين حزبيا و من بعديهم هيبتدي الشعب المصري يكره الميديا بالظبط زي فترة انتخابات البرلمان في 2011 ( هو اه بيحب الي يعرصله ) بس مع مرور الوقت بيكرهه و بيحس ان التعريصة ريحتها فاحت و بالتالي بيلفظه
Scene 4
زي مكان مجلس طنطاوي هو حصان طروادة الي عن طريقة حكمنا مرسي , و زي مكان الثوار و تمرد و حزب الكنبة هو حصان طروادة الي ظهر الفلول على الساحة من تاني , هيكون برضو الثواار هم حصان طروادة الي هيظهر من خلاله الاخوان من تاني ( و دة هيحصل اذا استمر اطلاق النظام الحالي العنان للفلول في الشوارع و اطلاق يد الشؤون المعنوية و الامن الوطني لادارة ملفات الاعلام و المرحلة الانتقالية )
The end
ينتهي جيم لعبة الكراسي الموسيقية الي في آخر ادوارها و اللعب على كرسي واحد بين الفلول و الاخوان ,, بان الكرسي يرجع لحد فيهم , و نعمل ريسترت و نبدأ جيم جديد

انها الفوبيا هي من تَحكم يا صديقي

 

ما يسيطر على الحالة السياسية في مصر منذ 25 يناير و حتى الان هي الفوبيا فلكل فصيل سياسي فوبيته التى تحركه و تحرك اتجهاته و تصنع التحالفات التي تجدها في كثير من الاوقات غير منطقية ... و لنبدأ باليسار 

اليسارين : تنتابهم فوبيا تاريخية و اصوليه من العسكرو هاجس عسكرة الدولة و القمع الامني من الامن النظامي و ذلك ما يحرك هذا التيار الي تحالف مع تيارات يمينية و احيانا يمينية متطرفة كالاحزاب ذات المرجعية الدينية ؛ اي تحالفات مع النقيض تجدها في كثير من الاحيان غير منطقية و فريدة من نوعها لم و لن تحدث الا في مصر !

الليبرالين : تنتابهم فوبيا كل ما هو اسلامي او اصولي و فجأة يستحضرون في اذهانهم صور الفاشية الدينية و صكوك الغفران في القرون الوسطى و الارهاب في تسعينات القرن الماضي و هو احيانا ما يضطرهم الي تحالفات مع القوى النظامية في الدولة ( عسكر او داخلية ) او مع رجالات النظام القمعي السابق لانهم بكل بساطة لا يرون الا الحل الامني للتعامل مع كل ما هو اصولي لاحساسهم المرضي بالهلع منهم 

الاخوان و التيار الديني : هم يعانون من الزانوفوبيا و هي رهاب الاخر او الخوف المرضي من الاخر ؛ هم دائما ما يتبنون نظرية المؤامرة فانهم يشعرون ان كل اطراف اللعبة السياسية  - واحيانا الكونية - تتحالف ضدهم و ضد افكارهم , بل و يغارون منهم و انهم هم جند الله في الارض و من دونهم اما اعداء او مُضللون , علاوة على مشكلة تاريخية مع القوات النظامية للدولة ( سواء داخلية او جيش ) و هذا للتاريخ الدموي بين المعسكرين المعسكر الاسلامي و المعسكر النظامي

العسكر  : و هو من اهم عناصر المعادلة السياسية في مصر - للاسف - العسكر لا يوجد عنده رهاب او خوف مرضي مثل التيارات المدنية على اختلاف اتجهاتها و لكنه عنده حرص شديد و حذِر جداا على مصالحة الخاصة و مكانته المتميزة سياسيا و اقتصاديا و شعبيا و دوليا في مصر ؛ و بناء على هذا فهو ينتهج مسلك عدائي ضد كل من يحاول سلبه احدى هذة المميزات التى يراها حق تاريخي اصيل له , فتاره تجد تحالفات يمينة اسلامية عسكرية ضد التيارات الثورية , تارة تجد تحالفات مدنية عسكرية ضد التيارات الدينية , و لكن دائما ما تجد تحالفات ليبرالية عسكرية خاصتا في اوقات رواج التيار الديني شعبيا 

ارجو ان تنكسر كل الفزاعات و ان يتحرر العقل المصري و الساسه المصريون من كل الهواجس المسيطرة علىهم - حتى و ان صح بعضها - و لكن علينا ان نتعامل مع الواقع بناء على التحاليل المنطقية و المقدمات و النتائج و ليس بناء على مخاوف سابقة و مرضية عن بعض التيارات و المعسكرات الاخرى فلا يوجد ثوابت في السياسة و فزاعة الامس من الممكن ان يكون مُخلص اليوم و من الممكن ان تصح النيات او تطرء التغيرات على بعض الاتجاهات

  

اراء مجمعة لما بعد 30 يونيه و حتى الان - محدث باستمرار

احداث الحرس الجمهوري

عارف انت ربنا وقعنا في اتنين ( مجلس عسكر قعد يقتل فينا سنة و نص و يبرر قتله ) و اخوان ( قدعو يكذبو و يبررو قتل العسكر لينا و لما هم وصلو الحكم قتلونا باديهم ) .. فلما تيجي بعد كل دة تلاقي الاتين بيتخانقو مع بعض - حتى و لو اختلفت الوشوش - متعرفش مين فيهم الي بيكدب و مين بيقول الحق علشان الاتنين عهدانهم كذاااابين !!!

_______________________

معركة رمسيس

يا حبيبي صدقني دول مش اذناب النظام و بلطجيته ؛ دول اهالي المنطقة ؛ يا متخلفين يا اغبيا يا ولاد الكلب انتو بقو ليكو دم مع كل منطقة في مصر !!! دول مش بلطجية النظام ولا دول من المعارضين !! كنا ياماااا بنقول ايام العسكر ان اهالي بولاق ضربونا عند ماسبيرو ؛ اهالي العباسية ضربونا عند مسجد النور ؛ كنتو بتضحكو علينا .. يا اغبياااااا الي بيجي على اكل عيش الناس الغلابة بياكلوه بسنانهم ؛ و انتو الشعب لفظكو علاوة على ان الشعب بيعشق الجيش اصلاااااااااا ... فمتشتغلوش نفسكو و تعدو ترردو كلام البغبغنات و تقولو الي بيقتل الاخوان اذناب النظام و بلطجيته انت عملت تار ليك في ( بين السريات - المنيل - سيدي جابر - المنصورة - الشرقية - دسوق - الفيوم - اسيوط - ماسبيرو وبولاق - العباسية ) عايزين تعملو دم مع انهي منطقة تاني !!!

*احنا قطعاااا مش مختلفين على حرمانية الدم و ان الي بيحصل دة كل حرام و غلط في غلط

2

الصراحة ( النشتااااء ) كل يوم بيثبتولي انهم اوسخ من اوسخ وسط ممكن تحتك بيه ؛ في ناس حاجزة مكانها في المعارضة حتى لو ابوها الي بيحكم لا ومش اي معارضة المعارضة بتاعت اسقاط النظام ؛ نقلهم يمين يقولو شمال نقول شمااااال يقولو يمين ,, و دين امي الورقة بتاعت تمرد الي انت ماضيت عليها و كنت بتوزعها مكتوب فيها كل الي حصل , رئيس المحكمة الدستورية و لجنة لتعديل الدستور و حكومة انقاذ وطني !!! طب انت عايز ايةةةةةة تااني !!!! مش فاهم و الله الناس المعترضة من اجل الاعتراض دي اية الصراحة حالكو يقرف و كل واحد يقلك مبادئ و تاريخي ؛ كلها بقت سعد زغلول

_____________________

دعوة السيسي للاحتشاد في الميادين 

في كذا سبب يخليني مش مطمئن للدعوة بتاعتت بكرة :

1-الاعلام و تحفيزة للناس و دعوته للنزول و الاغاني الوطنية و الهري الاعلامي بصراحة شكله مستفز اووووي و بيدل اننا ماشين غلط

2-مفيش وزير دفااااع بيطلب تفويض للمباشرة مهامه الي بينص عليها الدستور !! و لو انت جاي بتطلب تفويض بحاجة ضد القانون فاكيد مش هديهالك و اه السيسي بالنسبالي مش اكتر من وزير دفاع !! لا هو الاب الروحي للثورة ولا عبد الناصر الجديد ولا اي حاجة من دول , ما هو الا وزير دفاع ادي دوره ولبى نداء شعبه !

3-انا مبنزلش ارفع صور حد ! ولا بنزل بناء على دعوة شخص !

4- انتو اصلاااا مش محتاجني انزل و مش هتفرق معاكو اوووي معارضتي للنزول ؛ الكنبة هتنزل و هتملى الميادين متقلقوش عالحشد ؛ بس بعد كدة محدش يعيط لو الدم غرق الشوارع ولا لو قمع الدولة للحريات رجع من جديد و ينادي بالثوار

5-انا مبمضيش لحد على بياض " تطلع توصفلي كلمة مكافحة الارهاب بدل مهي كلمة مطاطية كدة ياماااااا اُستخدمت لحبس اصوات و قمع حريات و تقولي انت هتطبقها على مين و فين و امتى و مدتها اية " و ساعتها ممكن امشي معاك

6-نقول تااااانيي " انا ضد استخدام الحل الامنى لفض اعتصام رابعة - و محدش يقولي اعتصام مسلح و النبي - لسببين 1- ان فض الاعتصام بالقوة بيضعف موقفنا و بيقوى موقفهم و دي النقطة الي لسة مش واصلة للعسكر ان القوة عمرها ماكانت حل , 2- استخدام الحل الامنى بيبقى اخر الحلول بعد فشل كل المحاولات السياسية و للاسف محدش فكر في مرحلة ما بعد فض الاعتصام !! ردة الفعل العالمية و المحلية و ردة فعل التيار الاسلامي نفسه و نسبة التعاطف معاه الي هتزيد عالميا و محليا

انا مبختارش بين اخوان و عسكر ! انا رفضت الاتنين من زمان وخلصنا ,, السيسي وزير دفاع مال الي الثورة و مطالبها - رغم عدم اقتناعي بالبوء دة بس هو مش اكتر من كدة لو بنتكلم بالواقع بعيد عن الاراء الشخصية - ؛ الاخوان و انتهو خلاص .. و المدنية - الحرية - العدالة الاجتماعية .. مطالب رفعناها من قبل 25 و لحد دلوقتى و مش هنتنازل عنهااا .. مدنية لا دينية ولا عسكرية !!

2

يا جدعان و الله العظيم مش معنى اني مش نازل انا او غيري يبقى ضد الي هينزل او بنخونه او بنسفهه زي مبتعملو !!! يااااعم انزل انت شايف انك ماشي صح و انا و الله مش ضدك لان هدفنا واحد و احنا الي شلنا الاخوان سوا فبلاش بقى جو المزايدات دة ؛ الي يعرفنا يعرف احنا مين و سورري بقى هقول كلمتين مبحبش اقلهم مش الكنبة الي نزلو الميدان اول امبارح هيقولو عليا خاين !!! دي تبقى شخت اوووي ولمؤخذه

انزل ياعم و فوض و اعمل الي انت عايزة و انا مع حكومة الثورة الموجودة و مع جيش بلدي ضد الارهاب بس مش على كيفي الدعوة دي لاعتبارات شخصية و مبادئ كدة قديمة مش هتفهمها انت .. فكك مني منا كدة كدة مليش ثقل ياعم في الشارع و كمان انا مش ضدك بالعكس انا معاك .. # فكك_مننا

3

لا يوجد بطل في مصر الا شعبها و في مقدمتهم الثوار و لا يوجد من نمجد اسمه الا الشهداء فقط !!

4

نحن لا نحمل الا علم مصرر و صور الشهداء , لا نحمل صور معارضين ولا مؤيدين ! اهدافنا معلنة منذ فجر الحضارة عدالة اجتماعية - حرية - عدل - مساواة

5

عد الجمايل يا سيسي ؛

لما احتاجت الشعب لقيته في الشارع و بيض و شك اهو !! سليييم .. زي محنا احتجناك نزلت و لبيت ندائك الوطني ؛ نبقى خالصين

خلي بالك بقى ؛ في النهاردة مات لحد الوقتى 10 مابين مؤيد و معارض ولازالت الضحايا تتساقط .. لازم تخلصنا بقى من العنف دة زي موعدت ! و الشعب فوضك و قالك " قد فوضُتك نفسي  "

مع العلم ان زي محضرتك قلت مفيش في نيتك فض الاعتصام باستخدام الحل الامنى

6

و الله ما تنظّير بس هو عشان نلخص و نقفل بقى حنفية الدم دي :

الاخوان : عايزين خروج امن او بمعنى اصح عايزين عدم الملاحقة و عايزين فلوسهم و كوادرهم الي في السجون و على رأسهم مرسي و وعد انهم هيمارسو الحياة السياسية عادي و ضمنات بكدة

السيسي : عايز فض الميادين المؤيدة من جانب الاخوان ؛ وقف المسيرات ، الرضا بالامر الواقع , وقف نغمت بقى الشرعية و الرئيس الشرعي و لهجة الحض على العنف , وقف العنف في سينا و في كل حتة

احنا ( الثوار بتوع زمان ) : عايزين القانون ياخد مجراه لاننا للاسف رضينا بيه من زمان و الي علية حاجة يتحاسب عليها و مش عايزين اجرائات استثنائية ز

بس في نفس الوقت عايزين الاخوان تخلي الشارع و ترضي بالامر الواقع علشان نقدر نشوف احنا بقى شغلنا و نراقب السلطة الحالية و نحضر لانتخابات و معركة الدستور و الدولة الي بنحلم بيها ,

مش عايزين دم لا من هنا ولا من هنا و نوقف بركة الدم دي خاااالص ,

مش عايزين ارهاب و عايزين الدولة تشوف شغلها و الاجهزة المنوطة بمقاومة الارهاب تشوف شغلها

اعملوووو بقى ديك ام الصفقة مع بعض و خلصونا خلونا نشوف حلمنااااا - عن الاخوان و السيسي اتحدث -

7

مهو الحل الامنى و الدم لو كان بيجيب نتيجة كانت العلقة نفعت نفسها عن مبارك و مجلس طنطاوي اتحدث

يا جدعان بلاش غبااااااااااااوة الحل الامنى بيزود المشكلة و بيدي تعاطف للطرف الاخر دول و محلي و مبيحلش حاااااااااااااااجة بالعكس دة بيزود المشكلة و بيكبرها و بيزود حدة الاستقطاب و بيخلق سلسلة من نخااااااسي الدم

يا خرفااااااااان : العنف مبيحلش حااااااااااجة و مش هتستفيديو منه حاااااااجة ؛ محنا بقالنا سنيتن و نص في الشارع لو شايفين الارهاب كان هيوصلنا حاجة ما كنا عملناااااااه

يارب نخلص بقى عشان نعرف نشوف بقى شغلنااااا بقى و نعمل ديك ام البلد الي بقالنا سنيتن و نص بنحلم بيها

8

في حديث مع صديق اخواني

بعد اقراااار ان النظام السابق سقط بكل تبعاته  ؛ دستور هيرضى الجميع و انتخابات برلمانية يشارك فيها الجميع و اكيد هينتج عنها توازن حقيقي و بجد ؛ انت عايزني انزل اطالب بالثورة ! انهي ثورة !! الي اول ناس خانوها الاخوان !! افتكروها دلوقتى ؟! ؛ ارحمو نفسكو و صونو دمكووو و خلونا نشوف الي جاي ؛ استمرار العنف هيخسركو مش هيكسبكو ؛ مفيش اي تعااااااااااااطف شعبي معاكو ؛ لك ان تتخيل ان الي زي الي كان ضدكو على طول الخط هو دلوقتى الي بيتهاجم من الشعب المصري عشان بيقول انه ضد اراقه دمك 

خلاص الشعب ركبنا احنا الاتنين  يبقى مش من مصلحة حد يقف قدامه .. و اكيد انت من جواك متأكد قد اية الشعب خلاص لفظكو لدرجة انه بيتمنالكو الموت الجهري .. لا انتو هتقدرو علية ولا حتى لو كل ثوااااااار مصر انضمو لكو ؛ خلاص الكنبة قالت رأيها ؛ زي ما قالته قبل كدة لما اختارتكو في البرلمان و زي مختارناكو في الرياسة و هم قررو يسقطو نظام الاخوان ؛ يبقى صدقني مش هتقدر تقف قدامهم حتى لو انا معا

المصالحة الوطنية هي الحل

نظرة فلسفية بعيدا عن الثورية ؛ 

كل واحد حكم او اشتغل في سياسية البلد دي كان فاكر انه بيعمل الي في مصلحة البلد 

الفلول ( النظام السابق ) : كان فاكر انه بيحمي المصرين من نفسهم و انهم غير مؤهلين للديموقراطية و اختيارتهم هتبقى غلط , و قلهم الاسلامين دول كلهم ارهابين و لازم يتحطو في السجون و يتعذبو , قال للشعب ان لازم قبضة بوليسية من حديد علشان البلطجية كتير و لازم يتحط العصاية في طيزهم عشان دول مبيجوش الا كدة 

الداخلية : كانت شايفه انهم علشان يجيبو الحرامي يبقى ممكن يجيبو مراته و عيالة يضربوههم علقة موت عشان يقرو على مكان المتهم .. كانو شايفين ان احسن طريقة للتعامل مع المعارضين هي بالتجسس عليهم و انتهاك حرمات حياتهم و ارهابهم و اعتقالهم و تعذيبهم ان لزم الامر عشان ميعكروش صفو الشارع المصري .. كانو شايفين ان الثوار او السياسين الي بينزلو مسيرات و اعتصامات دول شوية عيال ملهاش شغلانة و بينطو على بعض و هيخربو البلد و بيتاجر بيهم او خونة و عملا للخارج 

العسكر : كان شايف ان الثوار متهورين و كل شوية قصاص قصااااص و انهم تطاولو عليهم شخصيا و هم متعودين ان كل الناس بتعظملهم فاستخدم معاهم العنف المفرط و كانه بيربيهم من اول و جديد , و راح اتفاوض مع الاخوان و قال هم دول الي  ليهم قاعدة في الشارع و هم دول الي ممكن نتكلم معاهم في السياسة عشان ممكن يشيلو البلد  لان التانين شوية عيال ملهمش كبير

الاخوان : هم شايفين ان لولاهم مكنتش الثورة هتنجح . و انهم اكتر ناس عانو من نظام مبارك و يستحقو حكم مصر . و شايفين ان انفرادهم بالسلطة دة ضروري لان مفيش حد فاهم غيرهم ولا حد نزيهه غيرهم . و ان هم الي حاملين المشروع الاسلامي الي ممكن يحكم العالم في خلافة زي الخلافة العثمانية  وانهم ممكن يستخدمو الميكافليه شوية في سبيل الهدف السامي دة

السلفين : شايفين ان كل الي على الساحة دول ينقصهم الدين او الدين مش في دماغهم و هم شايفين ان الشريعة هي المفتاح لكل الحلول و الشريعة هي من وجهة نظرهم هم فقط مش من وجهة نظر الازهر الي شايفين انه فاسد منهجيا و اداريا و لا من وجهة نظر حد تاني, و ان كل احتكاكهم بالسياسة علشان نقطة واحدة و هي الشريعة الي عايزين يطبقوها لان بالتبعية هيعم الرخاء بمجرد تطبيقها 

الثوار: هم بطبيعة الحال اصحاب الثورة الحقيقين و شايفين ان الثورة كانت لازم تحصل و انهم غلطو انهم سابو الميدان يوم 11 فبراير و شايفين العسكر ميصلحش لمصر و ان مدنية الدولة امر حتمي ضحو بارواحهم علشان تحقيقه و انهم لازم يتحطو على الخريطة السياسية بكوادر حزبية جديدة بعيدا عن الاحزاب الكرتونية القديمة . بعضهم رافض لقيادات التيار المدني و بعضهم معاه و مندمج في الاحزاب حديثة الولادة . شايفين ان الحل الثوري هو الحل الامثل لمصر و ان لا مكان للسياسة الا بعد القصاص و التطهير و استرداد الاموال المنهوبة دون الاكتراث بعامل التوقيت . عندهم مشكلة حقيقة مع الاستبداد و مرفوض  تماما بالنسبلهم  حتى و ان صحت النوايا 

كله شايف انه بيخدم مصر !! و علشان كدة لازم تتم مصالحة وطنية بتنظيم الثوار لانهم :

1- اكتر ناس عانو من كل الانظمة الفاسدة ( مبارك - عسكر - اخوان )

2- اكتر ناس بذلو شهداء و ضحو من اجل القضية 

3- حلم كل شهيد هي ان الوطن يبقى واحد بدون اي تقسيمات و ان الثوار يحكمو و يطبقو العدالة الاجتماعية - حقهم هيوصل لما دة يتحقق - مع استمرار المحاكمات المدنية طبعا - الي مش هتعمل حاجة للاسف - 

4- المصالحة الوطنية لما تيجي مننا احنا الثوار هي قوة لينا مش ضعف احنا هنبقى الطرف الاقوى في المعادلة ان شاء الله هنكون مسكنا مقاليد الامور على الساحة و اننا اكتر ناس لينا حقوق عند كل طرف من اطراف المعادلة بس هنفتح معاه صفحة جديدة علشان احنا اكتر ناس حرصا على مصلحة البلد

* المصالحة الوطنية هتم طبعا بعد ان يعترف كل طرف بخطأه و انه مش هيكرره تاني و انه استوعب الدرس  و ان الثوار هيبقو عين الشعب على التزام كل الاطراف بعدم تكرار اخطاء الماضي

* المصالحة الوطنية تتم بعد اسقاط النظام الحالي بكل تبعاته الدستورية و التشريعية و تمكين الثوار او التيار المدني من ادارة شؤون البلاد ( سياسيا او على اقل تقدير عن طريق حكومة انقاذ وطني ) 

* المصالحة الوطنية تتم بعد ان يرعاها دستور : يوفر المناخ الديموقراطي للبلاد و يحمي حقوق الاقليات و يحرص على التداول السلمي للسلطة عن طريق صندوق الانتخابات مع مراعاة حيادية الاجهزة المنوطة باجراء الانتخابات مع توافر اشراف قضائي كامل ( قاضي على كل صندوق ) و مراقبة دولية و محلية من المنظمات الحقوقية و منظمات المجتمع المدني . و تحديد اختصاصات وزارة الداخلية و فرض رقابة قضائية و حقوقية على عملها بموجب الدستور و القانون و الزمها بعقيدة حماية الشعب و المواطن و احترامه مع الحفاظ على هيبة ظابط الشرطة مالم يسئ استغلال وظيفته ... الزام الجيش بعدم المشاركة في الحياة السياسة و انهم مؤسسة منوطه بحماية الامن الخارجي و الحدود المصرية و الشعب المصري من الخطر الخارجي اولا , و الداخلي ان لزم الامر الي تدخله لحماية الامن القومي

سيناء من التحرير الي التدمير

سيناء من التحرير الي التدمير 

مقدمة لابد منها :

تعتبر سيناء من اهم الاراضي المصرية ذات البعد الاستراتيجي و الاقتصادي الهام و المؤثر , سيناء هي حدود مصر الشرقية ( الكيان الصهيوني - غزة - الاردن - السعودية ) بطريقة مختصرة هي همزة الوصل بين الشرق و الغرب العربي ..

سيناء التحرير : 

استعادت مصر سيناء بعد حرب 73 المجيدة و بعد اتفاقية كامب ديفيد المشؤمة التى جلبت بداية الخراب و الضياع السيناوي ؛ 

الاتفاقية و كما هو معلوم للكل تحجم سيادة الجيش المصري على ارض سيناء على الرغم من ان طبيعة ارض سيناء شديدة الوعورة و مليئة بالجبال التى تضم العديد من الخلايا الارهابية و الهاربين من القانون : و بذلك تصبح سيناء امنيا هي بقعة من  اخطر البقاع المصرية 

سيناء التدمير :

اولا التدمير الامني :

 العداوة الشديدة التى فرضها مبارك على بدو سيناء و قمعه لهم - وهذا ما نعاني منه حتى الان - لانه فضل التعامل الامنى معهم و قمعهم و جار على جميع حقوقهم و لم يلجئ الي الحوار و فضل القبضة الامنية الحديدة عليهم بل و سلبهم ابسط حقوقهم المدنية في تملك الارض التى يسكنون بها و حرمان اولادهم من الخدمة في جهازي الشرطة و القوات المسلحة و في رأي الشخصي هذا هو سبب الارهاب في سيناء 

و الحصار المباركي لاهلنا في فلسطين ادى الي زيادة و انتشار الانفاق في سيناء الواصلة مابين سيناء و غزة و التى لا تعلم عنها الدولة اي شئ و لا عن نوعية السلع المهربة من و اليها   

ثانيا التدمير الاقتصادي :

 فقد اسند مبارك المخلوع معظم مشاريع اعمار سيناء الي - شلة - رجال الاعمال المحيطين به و الذين نهبو خيرات سيناء و لم يفكر في اي مشروع قومي اللهم هي ترعة السلام و بعد ان صرف مليارات الجنيهات صارحنا بعد سنين بانه كان هناك خطأ في التصاميم يمنع من اتمام المشروع !

ثالثا التدمير الاستراتيجي : 

القيمة الاستراتيجية لسيناء تكمن في انها حدود مصر الشرقية مع الكيان الصهيوني و بعد معاهدة كمب ديفيد و اتفاقية نزع السلاح في الكيلوات القريبة من الحدود و الاقتصار على التسليح الخفيف و إلزام الجيش بعدد محدود من القوات ؛ فقدت سيناء قيمتها الاستراتيجية في المنطقة 

الحوادث التى تقع على الحدود المصرية لجنودنا بداية من ايام مبارك الي مرسي و الانبطاح السياسي للكيان الصهيوني او لارهابي الداخل المصري او قطاع غزة 

سيناء الان :

سيناء الان اُختطفت كما اٌختطفت مصر باكملها ؛ سيطرت الجماعات المسلحة على سيناء تقريبا ؛ نتيجة للغياب الامنى و محدودية دور الجيش داخل سيناء و زادت الخلايا الارهابية او الجهادية - سموها كما شئتم - زادت تجارة المواد المخدرة و السلاح , زادت الانفاق الواصلة بين مصر و غزة و تجارة الانفاق , اما اقتصاديا فشأنها شأن كامل الجمهورية ؛ تقلصت نسبة السياحة بشكل كبير جدا و سادها الكساد مثل كامل بقاع الدولة 

الحل !!

من يعتقد ان الحل الامني للقضية السيناوية هو الحل الامثل و الاوحد فهو واهم ؛ الحل الامني يا سادة هو مجرد مُسكّن للمشكلة و لا يحلها ؛ الازمة عميقة و يلزمها خطط عمل طويلة الاجل واخرى فورية 

خطط طويلة الاجل :

• لابد العمل على زيادة الوعي السيناوي الديني و الثقافي و التعليمي و نشر المعاهد الازهرية و الدعوة الازهرية في الجوامع للحث على روح ديننا الحنيف في نبذ العنف و تحريم الارهاب و الاهتمام بتعليم المواطن السيناوي  
• لابد من جعل سيناء مشروع قومي مصري - السد العالي لهذا العصر - نعم فسيناء لا تقل اهمية عن السد العالي ؛ سيناء من الممكن ان تكون اكبر ميناء تجاري عالمي في فترة قصيرة و ستدر دخل قومي يكفي لاصلاح البلاد 
• استصلاح اراضي سيناء و جعلها اهم المناطق الزراعية و الصناعية المصرية
• فرض السيادة المصرية على ارض سيناء حتى و ان لزم الامر تعديل بنود اتفاقية كامب ديفيد  

خطط فورية :

• الحواااااار ثم الحوااااااار ثم الحواااااااااااااار مع اهل سيناء و هذا اسهل مما يكون لان اهل سيناء يمتازون بتنظيمهم فلكل قبيلة شيخ و هناك مجلس لشيوخ القبائل و جميع القبائل ملتزمة بقراراته 
• قانون فوري يتيح الحق لاهل سيناء في تملك اراضيهم و لكن مع مراعاة كامل السيادة المصرية للاراضي السيناوية 
• قبول اهل سيناء للخدمة في جهازي الجيش و الشرطة 
• عدم استخدام قبضة مبارك الحديدية مع اهل سيناء من جديد فقد اثبتت فشلها الزريع , و اعمال القانون و عدم اتهام اهل سيناء ( التعميم ) بالارهاب و تجارة المخدرات فهناك الصالح و الطالح فيهم , و عدم الصاق التهم الجزاف بهم و تعذيبهم في سجون الدولة لانتزاع اعترافات 
• هدم كل الانفاق بالاتفاق مع اهل سيناء و فتح معبر رفع - دائما - للاخوة الفلسطينين