اخترت ان ابدأ التدوينة بعنوان انا مش ملحد , نظرا لغرابة ما ساطرح على البعض
- انا مش نزلالي من زور ان كل المسلمين هيخشو الجنة حتى و ان كان فيهم من قتل و ظلم و افسد ,, انا مش عارف الي جاب الفكرة دي جابها منين الصراحة و قد اية هي فكرة بتحول المسلم لانسان منافق و ازاااي الناس شايفاها صح ؟؟؟ يعني حتى فكرة ان العصاه يعذبون في النار حتى ان يهذبو دي اكثر قبولاً بكتير و دي الي ثابتة دينياً اكتر , انما كل المسلمين بلا استثنائات هتخش الجنة بما فيهم العاصي و الظالم و القاتل و الفاسد !! دي مش فكرة صحيحة من وجهة نظري
- فكرة ان كللللللللل الناس من غير المسلمين هتخش النار دي برضو فكرة بالنسبالي مش صحيحة - و هنا كتير من الناس هتتهمني بالالحاد بقى - , هل وصل للانسان الي غير الاسلام دة الرسالة ؟؟ طب وصلته ازااااي ؟ و لو وصلته وصلته بالطريقة الصحيحة ؟؟ و لا كان في واحد حمارمثلا الي وصلهاله و بالتالي خلاه يقتنع ان دين الاسلام هو دين قتل و اهانة للمرأة و لو مش هتصلي ال 5 صلوات و تربي اللحية جهنم و بئس المصير ؟؟ يعني في حاجة في علوم الشريعة اسمها كفر جهل و كفر اعراض .. اعتقد بقى نسيب ربنا يحكم فيمن كان كفرة كفر جهل و كفرة كفر اعراض و هناك من قال ان من كفر كفر جهل فيمتحن و في اجتهادات كتير في الموضوع دة ,, بلاش احنااا نعد ندي صكوك النار للناس عمال على بطال
- سؤال بسيط ؟ تفتكر الامريكاني الي عايش في بروكلين مثلا وصلته رسالة الاسلام ؟؟؟ هتقوولي طبعااااااااً .. هقلك ازاااااااااي ؟؟ هو اه يعرف ان في دين اسمه اسلام , الستات فيه بيلبسو نقاب و الرجالة فيه بتلبس جلبية و عندهم حاجة اسمها جهاد معناها انه يقتل اي حد غير مسلم و بيحرم الخمرة و بيروحو يلفو حوالين بناية كدة في السعودية كل سنة .. و فجرو في امريكا برجين و بيفجرو نفسهم في السفارات و امريكا بتحارب الارهابين منهم في العراق و افغانستان .... هل تعتقد ان دة انسان وصلته رسالة الاسلام ؟؟ هو اصلاً كاره للاسلام الي في مخيلته الي هو مش اسلام اصلاً
- كيف يصل الغير مسلم للاسلام ؟؟ 1- ان كان واحد عادي عايش في الاسكا او براج او اي حتة غير منتشر فيها الاسلام هتلاقي ثقافته عن الاسلام متاخدة من الاعلام الي بيشوه كل ماهو اسلامي سواء كان بقصد او بيتحامل عليه او عن طريق استغلاله لمسلمين يشوهن الاسلام زي داعش و القاعدة و غيرهم2- ان كان مثقف شويتين هتلاقيه جايب معلوماته من كتب المستشرقين الي برضو مبهدلين الاسلام و حاول يتكلم مع كام مسلم فوقع في كام واحد من بتوع انت في جهنم و بئس المهاد او وقع في واحد و حاول يتناقش معاه فالتاني كان حومار و قاله انت اصلا كافر لما الامريكاني قاله انتو ازاي بتخلو الست تتنقب و دة تخلف ..السؤال هنا هل دة انسان وقعت علية الحجة و تم تبليغه الرسالة عشان يخش النار ؟؟
- النقطة دي بقى عن انتشار الاسلام , و ان في مسلمين مقتنعين ان الاسلام مكنش هينتشر الا على حد السيف !! بيرددو كلام المستشرقين زي البهايم مش عارف ازاي !! مقتنعين ان الاسلام انتشر على حد السيف و هتناول النقطة دي بالتفصيل
- الرسول استحمل مالا يتحمله بشر عشان ينشر الرسالة ولما ربنا خيره انه يطبق الجبلين على قريش الرسول رفض و فضل مكمل في طريق الدعوة , الرسول هاجر للمدينة و لم يقتل يهودي و عاش جنبهم و لم يجبرهم على اي شئ , اول حرب في الاسلام كانت غزوة بدر و كانت ليها اسببها و ان الرسول كان عايز يسترد ما سلب منه و من اصحابه في مكة و هي لا ترتقي لكلمة حرب لان تعداد المسلمين ساعتها 300 و الكفار 1000 , فهي خناقة و دة لا ينقص من بطولة المسلمين فيها من شئ ولا حاجة انا بس عايز اوصلكو انها معركة صغيرة جدااااا يعني كان الداعي منها استرداد اموال المسلمين .. و دي كانت الغزووووة الوحيدة الي بدئها المسلمين و قتل فيها 70 من المشركين و 14 من المسلمين و 70 اسير من المشركين يعني الارقام بتحصل في حادثة دلوقتى .. و برضووو تاني هذا لا ينقص من نبل و بطولة الغزوة و من ثبات الصحابة ساعتها و لا ينقص من الانتصار
- بعد بدر بقى , كلها حروب كان الهدف منهاااا القضاء على الرسالة و قتل الرسول , غزوة احد الي اتهزم فيها المسلمين , غزوة الخندق الي حاصر فيها المشركين المسلمين في المدينة في عقر دارهم .. و بعد دة كله انعم الله على المسلمين بفتح مكة بدون حرب و دخل كتير من المشركين في الاسلام
- غزوات ما بعد اقامة الدولة الاسلامية في مكة .. كلنا كنا بناخد وحنا صغيرين في المدرسة ان الرسول بعد رسالات الى كل الملوك يبلغهم بالرسالة !! لية يا تري ؟؟ عشان كان العرف السائد في العصر دة ان الشعب على دين ملكة ! يعني متلقيش ملك يهودي و شعبة بوزي مثلا .. احنا بنتكلم عن 1400 سنة ورااا يا جماعة !! انتو مقدرين دة ولا لا ؟؟ يعني كان العالم فرس وروم واحد مجوثي و التاني بيعبد الاوثان و المسيحية لسة بتشق طريقها على استحياء لاوربا ..
- كل الغزوات الي حصلت في عهد الرسول و ما تلاه من الصحابه كانت لنشر الدعوة في ممالك رفض ملوكها توصيل الدعوة لشعوبهم !! و دة حكم شرعي اذا حال شخص بين تبليغ الرسالة لشخص آخر وجب قتاله اما اذا تمكنت تبليغ الرسالة يحرم قتاااالهم , اسألو فيها اي حد .. , هل قاتل الرسول المقوقس ملك مصر ؟؟ لا لية !! عشان المقوقس رد على رسالة الرسول بستنا ماريا القبطية الي تزوجها الرسول و سيرين بنت شمعون , مع ان المقوقس لم يبلغ الرسالة لشعبه !!! و لكن لم يختار الحرب و علشان كدة لما اشار عمرو ابن العاص على عمر ابن الخطاب بفتح مصر اختار عمرو فتح مصر لشده ما يعنيه اقباط مصر من حكم الروم و ان الروم لم يتروكو المسلمين ينشرو الرسالة في مصر و تعرضولهم اكثر من مرة في قوافل عمرو ابن العاص التجارية ..
- فين بقى حضرتك الاسلام الي انتشر على حد السيف دة ؟؟ فين !! مهو دة كان العرف السائد في تلك القرون ؟؟ عرف القوة, حتى تبليغ الرسالة كانو منعين الناس منه !! دين الشعب هو دين الملك ..
- كيف وصل الاسلام الي افغانستان و مالايزيا و دول اسيا و البوسنة و دول شرق اوروبا ؟؟ عن طريق القوافل التجارية و حسن معاملة التجار المسلمين و على فكرة المسلمين غير العرب و من سكان الهند و اسيا و اوربا الشرقية هم اكثر عددا من مسلمين العرب .. يعني الموضوع لا في حد سيف ولا بتنجان - الاسلام عمره ما كان دين تواكل ولا هو دين للاخره بس و الصلاة هي مش حركات للتريض بنعملها 5 مرات في اليوم , بس بعدها ممكن نقتل و نفسد و نظلم !! يعني مينفعش اتسند على ان انا مسلم و بصلي بس في شغلي اخد رشوة و اعد عالقهوة اقذف المحصنات و اخوض في الاعراض و اظلم الي تحت مني و ادوسهم .. الاسلام زيه زي معظم الاديان الي بتحس على الفضيلة و حسن الخلق و الرقي بالانسان , و محدش يقووووولي دي نقرة و دي نقرة .. انا مش شايف اسلام في المسلم الي بيصلى ال 5 فروض بس بيسرق او بيقتل او بيظلم او بيفسد في الارض .. موضوع منتهي يعني
كام طاغوت حكم المسلمين باسم الاسلام و كم مجزرة اتعملت باسم الاسلام و كم عمل ارهابي اتعمل باسم الاسلام و اضر نشر الاسلام ؟؟ ما شاء الله احنا دايما بتحكمنا ناس بتصلي في التلفزيون و بيطلعو ديك ابونا في الزنازين .. - فكرة التعايش مع الآخر !! دلوقتى الاسلام بقى دين بيحس على عدم التعايش مع الاخر ؟؟ طب ازااااااااااااي !! ازاااااي الوقتى بقى عندنا جماعة بتقول انها بس هي الي هتخش الجنة و هي بس الي مسلمة و كلنا كفار ؟؟ ازاي بيقولو اننا نطرد غير المسلمين من بلادنا !! ازاي بينفذو عمليات جهادية - على حد وصفهم طبعا - ضد كل من هو غير مسلم اياً كان هو مين رجل او ست او كبير او صغير ؟؟!!
- على مر التاااااااريخ الاسلامي من ايام الرسول لحد سقوط الخلافة الاسلامية , بلاد المسلمين كانت البلاد الوحيدة في العاااالم الي فيها تعدد اديان و كل المواطنين سواسية في الدولة الواحدة و القاضي بيحكم بالعدل للمسلم و لغير المسلم , الكلام دة مكنش في اوربا ساعتها !! اوربا ساعتها كان الواحد ممكن يتحرق حي و الكنيسة تتهمة بالشعوذة علشان بيقرأ كتاب لارسطو , شوف اوربا فين دلوقتى و احنا فين !!
- غير المسلمين كانو بيوصلو لاعلى المناصب في الدولة في عهد الخلافات الاسلامية , منهم الوزير و منهم مستشار الملك .. فكرة التعااااااايش هي اساس بقاء و انتشار الاسلام , الاسلام احتضن كل الحضارات و اضاف لكل الحضارات و على من شأن الانسان و اضاف للانسانية , كام عالم غير عربي مسلم اضاف للبشرية ؟؟ متعدش .. ياخي دة الي اشار على الرسول بحفر خندق حولين المدينة في حرب الاحزاب كان سلمان الفارسي و هو فارسي غير عربي و الرسول استحسن قوله رغم انه كان مع انه يخرج يلاقي المشركين خارج المدينة ببضع اميال و هنا سأله سلمان هل هذا وحي يا رسول الله فقال له لا بل هو رأي يا سلمان , فقله سلمان على فكرة الخندق الي كانت جديدة على العرب و الرسول اخذ برأيه و كانت سبب في انتصار المسلمين ... الرسوووووول اخذ رأي غير رأيه و من واحد غير عربي و حديث الاسلام و لم يصر على رأيه
- البتاني هو عالم فلك مسلم ياريت الناس تقرأ عنه هو السبب الرئيسي في تعديل نظرية بطليموس في العلم الحديث , الراجل دة من حتة بين العراق و ايران و اهله كانو من الصابئة و هو دين و الراجل دة كان في القرن التالت تقريبا الهجري و اسس المرصد الفلكي و جمع فيه كل علماء الفلك المسلمين و الغير مسلمين من كل بقاع العالم ساعتها و اسهاماته و كتبه بتدرس في اوربا لحد الوقتى و ارااااااااااااااهن لو حد يعرف عنه حاجة اصلا دلوقتى من العرب .. هل دة دين ضد التعايش مع الآخرين وضد العلوم ؟؟ الكلام الي انا كاتبه دة كان بيحصل من 1500 سنة !! وقت الانسانية فيه كانت تقاس بالدراهم و الدنانير و الاستعباد دة شئ عادي و هو ضرورة حياتية - الاسلام دين يدعو الي العبودية .. طب ازااااااي ؟؟ ياخي دة انت لو دورت عن كفارة اي حاجة في اي حاجة في الاسلام هتلاقي فيها فك رقبة .. زي ما الخمر ربنا حرمها بالتدريج العبودية في الاسلام تم تحريمها بالتدريج و لكن بطريقة غير مباشرة حتى لا تصطدم مع الفكر البشري السائد من 1500 سنة , العبودية على فكرة اتلغت من 200 سنة بس في العالم كله .. ولكن تعالى اكلمك عن حقوق العبيد في الاسلام , يارجل دة في مقولة مش فاكر مين الي قالها الي هي لولا بري لامي و حج البيت لفضلت ان اكون عبداً في الاسلام .. مش فاكر المقولة مين الي قالها ولا اتقالت ازاي بالظبط ..
هل بهذه الافكار اكون ملحد يا ناااس ؟ هل بهذة الافكااار يطلعلي خازوق يقولي انت بتفكر في حاجات الاسلام قالك متفكرش فيها , هل الصح اني اقول ان كل الناس غير المسلمين وحشين و هيخشو النار و انا كمسلم ضمنت الجنة و من حقي اعيش بقى افسد في الارض زي منا عاوز ؟؟ هل اذا حكمني مسلم طاغي قمعي قاتل اطيعه علشان ولي الامر و اذا حكمني غير مسلم بس عادل اخرج عليه , حتى لو كانت الدنيا اتغيرت و مبقتش ملك و خلافة زي زمان و الحاكم دلوقتى ماهو الا موظف بيسير على الدستور المنصوص عليه في البلاد ؟؟اشهد ان لا اله الا الله و ان محمد رسول الله
