ديماجوجية المجلس العسكري !! للأسف نفذ رصيدكم

تبدأ الحكاية . حكاية الجيش و المجلس العسكري من يوم 28 يناير .

انا شخصيا اول ماشوفت الجيش نازل الشوارع يوم 28 فرحت , مش ثقة عمياء في المجلس العسكري , لا , ساعتها انا مكنتش عارف الجيش نازل مع مين , شوية و قالك على الحياد , و بصراحة انا مكنتش شايف ان في حاجة اسوء من الداخلية سعتها و ان اي سلطة في الشارع هتكون احسن من عساكر القمع المركزي و وزارة الداخلية الارهابية .. كلنا فرحنا بس بحذر

نبدأ فصول المسرحية .. طفو النور و رجعو الكراسي .. و انا مختصر الموقف جداااااااا متقلقوش

الفصل الاول : يوم 2 فبراير - موقعة الجمل

الجيش كان عمال بيقول نازل على الحياد على الحياد على الحياد . و جهه وقت موقعة الجمل . في منظر في دماغي مش ممكن انساه . منظر دبابة عليها ملتوف و ناس بتضرب طوب على معتصمين التحرير و اذا بسائق الدبابة بيخش جوة دبابة و بيقفل الغطاء علية و المعركة مستمرة !! حيـــــــــــــــاد !.؟؟؟ حياد اية و ازاي ؟ هوا فية كدة ؟ دول بلطجية و افراد امن جاين بيتهجمو على معتصمين سلمين . اذاي بقول حياد اذاي سايب دة بيحصل قادم عينك .. حماية المتظاهرين و المعتصمين دي مسؤلية حضراتكو بعد اسنحاب الداخلية - الي كانت بتحمي المعتصمين حماية مفيش بعد كدة يعني الشهادة لله و عجبي - المفروض ان الكلام دة كل داساتير العالم و كل المبادئ الانساينة بتقره

و عدى يوم موقعة الجمل و قلنا لا الجيش اكيد هيتحرك في صفنا بعد كدة , و جه يوم 11 فبراير و نبأ التخلي و اجتماع المجلس العسكري و في وسطهم طنطاوي ! طنطاااااااوي !؟ اية دة ! دة مقرب جدا من مبارك طب ازاي ؟ بس بردو لقيت لنفسي حل اقنع نفسي بية ان طنطاوي هوا مجرد واحد من المجلس العسكري الي مكنتش لسة اعرفة و قلت اكيد هوا ميقدرش يفرض سيطرة على المجلس كله

و اتنحى الريس و اللواء رفع التحية للشهداء و قعدت اسقــــــــــف لحد مأيدي و جعتنى .. و بيان واحد في اتنين في تلاتة و كلام زي الفل و اللواء اسماعيل عتمان يطلع في التلفزيون و حافظو على مصر و مشهد رائع .

الفصل الثاني : الاستفتاء

دة كان الي بينلي كل حاجة قدام عيني .. كلنا كنا عايزين حكومة و مجلس رئاسي و دستور .. ثورة بقى .. عايزين نعمل بلد جديدة .. بس لقينا ان كل واحدة من ال 3 طلبات دول عايزلها حرب و ثورة لوحدها

بدايتنا كانت مع الحكومة و شفشفق بس شلنا شفشفق و جبنا شرف .. جنا نقول مجلس رئاسي .. لقينا هجوم غريب علينا .. و ازاي هوا انتو مش واثقين في الجيش ! انت عملاء . ماشي يا عم الحج انا بحب الجيش و الله و هنخدم فية كلنا و بحب المجلس الرئاسي خلينا في الدستور .. قال لا احنا هنزل 6 مواد نستفتى عليهم !!! يا سيدي عازين دستور ! لالالالا دستور اية ! احنا هنعمل 6 مواد - الي اصلا هما كانو متحرفين و وضع طبيعي انهم يتغيرو - عايزين دستور .. كدة طب نلجأ للصندوق ! و غلطنا و لجأنا للصندوق !

و ظهرت النتيجية 77 % نعم , لدرجة اني حسيت ان انا و صحابي بس الي قلنا لا .. طب اية العمل يا رجالة .. قالك عادي معلش سواء نعم او لا فكدة كدة الدستور هيتغير و هوا بس اختلاف في الترتيب و الاليات .. عصرت على نفسي لمونة و قلت ماشي .. و طلعلنا الجيش البيان الدستوري مكون من 63 مادة .. انا بقى زي الشاطر روحت استفت على 6 مواد طلعلي هوا 63 مادة !!!

لا و شوية يقلك دة استفتاء على الدين ؟. و شوية يقلك دة استفتاء على الجيش ! الله !!! هوا انا بس الي روحت استفتيت على ال6 مواد دول ؟؟

و من هنا حسيت ان المجلس بياخد قرارات فردية مش بمشاركة الشباب الي عمل الثورة و لو بيستشير حد بيستشير فصيل معين بعينة او كام حزب كرتوني من الي موجودين في مصر

الحل اية ؟!!!!!!! هنقول الحل في الاخر

الفصل الثالث و الاخير : تجميع لكل مواقف الجيش من بعد الاستفتاء

1- المحاكمات العسكرية لمدنين : مدونين و نشطاء سياسين و اتهمهم بالبلطجة و بيلبسو حبس وقتي في حين ان طلع عين الي خلفونا علشان نخلي المجلس بجيبلنا جمال و علاء و و مبارك و بقية شلة الفساد

2 - قانون تجريم التظاهر و الاعتصام

3- مشهد متكرر ! في كل النزعات الطائفية الجيش بيجي بس متأخر ! و اغربهم كان الاشتباك الي عند ماسبيرو

4 - ليلة 9 مارس السودة و الجيش يكشر عن انيابة .. سواء التحرير كان صح او غلط بس الجيش اتعامل بقوة مفرطة

5- مشهد السفارة الاسرائلية ! امن مركزي و جيش و قمع غريب للمتظاهرين

6 - البلطجية الي الجيش منفضلهم و ماسك في المدونين و النشطاء و اصحاب الرأي و القلم و سايب البلطجية في البلد يسلونا

7- التبااااااااااااااااااطئ الذي يدخل في اذهانا التواطئ

8 - شلة بورتو طرة الي لا شفنا منهم مليم احمر و لا شفنا فيهم قرار الا في العادلي الي شكلها كدة العادلي هيبقى كبش فداء المجموعة دي

9 - امن الدولة . دة كان منظر الموسم .. الجيش عارف و شايف ان فية ملفات بتتحرق و واقف بيحمي مقرات امن الدولة و السنة اللهب بتتصاعد ! ممكن يكون هوا عارف مصلحتنا فين الله اعلم ! عجبي يعني

الحــــــــــــــل : جمعة 27 مايو

بالبلدي كدة طالما انا مش عارف اخد حق ولا باطل من الحوارات و النقشات يبقى الحل في الشارع .. لان دة اسلوب الضغط الوحيد الي عندي و اثبت فعاليته لان كل اما نضغط المجلس ينقطلنا مطلب من المطالب

الناس بتزعل من كلمة مجلس رئاسي مدني .. ماشي يا سيدي .. مش هنقوول مجلس رئاسي بس لينا كدة كام مطلب مش هنمش من الميدان الا لما يتحققو .. علشان اية حاسين بقى كدة و لمو أخذة ان الثورة بتتسرق او بترجع للخلف

اولا كدة المعتقلين السياسين كلهم يطلعو برائة

ثانيا الباشاوات بتوع بورتو طرة يتحكمو بجرائم افساد سياسية - مش كسب غير مشروع و ضحك على الدقون - يعني تهم خيانة عظمى و اوامر قتل عمد .. و افساد اقتصاد و اهدار مال عام .. و افساد الحياة السياسية .. و شوية التهم الي بتجيب اعدام دي

ثاثا الغاء قانون تجريم التظاهر

رابعا القضاة الي هيتولو القضايا دي يكون مدنين مشهود ليهم بالنزاهة بس تكون الاحكام و الاليات عسكرية و بتهم الي انا قلت عليها

خامساااا دي بقى انا مش عارف تتعمل ازاي بس انا عايز يبقى في مشاركة في القرارات و القوانين المرحلة الجاية .. يعني مفيش قرارا فردي و الله تتعمل بحوارات وطنية بمجلس ب مفـــك حتى المهم انها تحصل

سادسا و دي امنية ان على الاقل طالما مش عارفين نعمل دستور دلوقتي يبقى بالصلاة على النبي كدة عايزين ورقة مبدائ فوق او غير دستورية تكون غير قابل للنقاش في لجنة تأسيس الدستور الي هتيجي من مجلس الشعب الي ربنا يستر عليه و منلقيهوش عبارة عن حزب وطني جديد .. يعني اول مادتين كدة دول غير دستورين و باب الحريات كاملا و استقلال القضاء استقلال تام و كامل و اشراف القضاء على جهاز الامن الوطنى .. و كام حاجة كدة هنتناقش فيهم .. بس الكام باب و كام مادة دول .. لازم يكونو غير دستورين يعني ان شا الله لو جبتو حسن شحاتة يحط الدستور دول يتحطو كدة كوبي بست محدش يلعب فيهم و لا اصلا يطرحو للأستفتاء و الكلام دة

سابعا سرعة تعويض اهالي اشهداء و علاج مصابي الثورة على نفقة الدولة و تعويضهم التعويض المناسب

ثامنا عايزين كدة خريطة اقتصادية نعرف بيها المرتبات هتترفع امتى و اقتصادنا عامل ازاي و الفلوس الي برة دي هترجع امتى و ازاي حتى لو هنجيب " مازيلي " يمسكلنا القضية زي ما مسك قضية اجوجو للزمالك قبل كدة ههه

اتمنى ان المجلس يستجيب لمطالب الثوار الحقيقين اصحاب هذة الثورة المجيدة .. و انا حاساس ان دة هيحصل ان شاء الله

انزل و اقف على مطالبك مترجعش الا لما تتحقق كامله .. انزل احمي ثورتك انـــــــــــزل التحريـــــــــر .. ميدان الشهداء و ارض الامجاد

ملحوظة : بعض المطالب هيا مطالب و احلام شخصية منى انا