وهم الاستقرار ( اجتماعي ساخر )

كلمة الاستقرار التى افسدت علينا حياتنا .. وهم ظل يطارده الانسان طيلة حياته و لكن لم يعثر علية منذ بداية الخليقة .. حتى عندما كانت المجتمعات ابسط من ذلك بكثير كانت محفوفة بالخطر الدائم اما باسباب كونية او باسباب اجتماعية قبل بداية التحضر ... سأكمل التدوينة بالعامية لانها تدوينة اجتماعية ..

* لو التدوينة طويلة شوية فمعلش حاولو تقروها لاخرها اوعو تاخدو الجانب الكوميدي و تسيبو الجانب التراجيدي 

الاستقرار السياسي .. لقيتو الاستقرار ايام مبارك ؟؟ طب ايام مرسي ؟ طب ايام الثورة ؟ طب ايام السيسي ؟؟ الحقيقة ان حضراتكو ملقتوش الاستقرار في اي وقت من الاوقات دي و اختارتو غلط اصلاً بداعي انكو بتدورو على الاستقرار , مبارك الامن و الامان , مرسي الاستقرار و النهضة , السيسي هيرجع الامن و يفرض الاستقرار .. و في الواقع مازلتو غير راضين لانكو بتدورو على شبح مش موجود اسمه الاستقرار , بس اختارتو غلط  , ضيعتو الثورة و ضيعتو البلد و مشفتوش لا امن ولا استقرار و لا نهضة ..

الاستقرار على الجانب الاجتماعي و الشخصي .. 

كام واحد فيكو شغال الشغلانة الي بيحبها او كان بيحلم انه يشتغلها ؟؟ طب بلاش كام واحد حاسس بالامان في شغله و انه ممكن يجي عليه بكره و ميكونش في الشارع ؟؟

كام واحد بيعافر بايده و سنانه عشان يتجوز البنت الي بيحبها عشان الجواز هو الاستقرار ؟ طب كام واحدة سابت حبيبها و اتجوزت الجاهز عشان عايزة تستقر و تتجوز و تخلف و حبيبها مش جاهز ؟ 

طب كام واحد اتجوز و كان فاكر ان الجواز هو الاستقرار و اتفاجئ ان المشاكل بعد الجواز اضعاف المشاكل قبل الجواز سواء بينه و بين مراته ( الي قلما بتكون هي حبيبته )  او مشاكل مادية او نفسيه .. 

تعالو ندي مثالين عن شخص مستقر , و شخص ما استقرش .. 

الشخص المستقر :

موظف حكومي او قطاع خاص مش فارقة الصراحة كتير , مرتبه يادوب معيشه بالزق مخلفله عيلين و متجوز واحدة - بيقول انه بيحبها -  عنده شقة تمليك اقساطها ان شاء الله هتخلص كمان 20 سنة - يعني هانت خلاص - بيخلص شغله يرجع بيته يتغدي و ينام و ينزل يلعب عشرة طاولة على القهوة يطلع بيته يلاقي مراته بتنيم العيال يتعشي و ينام - الجانب الترفيهي بيكون يوم الخميس و الجمعة و بيتلخص في مدة تتراوح من 15 لي 30 دقيقة نصهم بيكون ياحمد انا تعبانه النهاردة من شغل البيت و يا فوزية هاتي بوسة - يخلص اللقاء الحميم - ان جاز تسميته هكذا - تلاقي مشاكل الدنيا و الاخرة بتتقال على نفس الفراش , فاتورة الكهرباء جت فاتورة الغاز , التبرعات بتاعت المدرسة الاجبارية , عايزين ياميش رمضان , اللحمة غليت عايزين نزود المصروف , امسكي ايدك شوية انتى مبزرة دنا بديكي مصروف 300 جنية بحاااالهم , تقوم فوزية فارشة الملاية "اية اية ايــــة و هم ال 300 جنية جنية دوووول انا  بجيب بيهم زواااء لنفسي ما نت و عيالك الي بتاكلو يا حبيبــــــي " ... و دايما اليوم بينتهي باتخمدي او ربنا ياخودني من وشك يا بعيدة و بيكون الرد و ياخدنا انا كمان دنا قرفت عيشة تقرف ..

صفات الشخص المستقر :

• عمرة ما بيقول لا ,, مبيقلش غير حاضر و نعم .. تحت امرك يا سعادة البيه المدير 
• هتلاقيه دايما قنووووع من نوعية مش احسن ما نبقى زي سوريا و العراق , قنوع اوووي بس بالخراء
• الوطنية عنده بتتلخص في ماتش مصر في افريقيا او ان مصر مشيبه الموساد الاسرائيلي  و ان ادهم صبري دة شخصية حقيقية و  عندنا نووي بس مخبينه من امريكا 
• بيكره التغير و مصاب بالزانوفوبيا و هو رهاب الاخر او رهاب كل شئ غريب عليه , يعني لو هو مسلم فهتلاقيه عنصري ضد المسيحين و العكس , شايف ان المصرين دول اعظم شعوب الكون بس امريكا و اسرائيل و ايران و روسيا و حزب الله و جزر القمر و كوكب القرود بيعمل مؤامرات على مصر علشان خايفين منها و بالتالي شايف ان كل الغير مصرين زبالة و هو بس الي كويس 
• متدين بطبعة يعني تلاقيه بيصلي ال 5 فروض بس ممكن يرتشي او يسب الدين و هو بيتفرج على ماتش او يشهد شهادة زور او يظلم  حد او يقصف محصنات  .. عادي المهم انه بيصلي و بالتالي طبعا هيخش الجنة  على جيت سكي , مش بيصلي !!  يبقى جنة وووش

اما بقى الشخص الغير مستقر : 

شاب كل الناس شايفه بايظ او فاسد او منحل , بيشتغل احياناً و احياناً لا , بيحاول يعمل الحاجات الي بيحبها , معظم الوقت مفلس بس لما بيبقى معاه فلوس بيعمل الحاجة الي نفسه فيها اياً كانت في اي وقت دون الاكتراث بالمجتمع و عاداته , هو ساكن فوق سطوح عمارة في وسط البلد , مبيفكرش في الجواز على قد ما بيفكر في الحلو الي في الجواز  , من الاخر مش متجوز .. بيحب بنت و يتمنى يكمل عمره معاها باي طريقة ما حتى لو كانت شبح الجواز الي بيخاف منه , بس في الغالب بتسيبه و تتجوز و بيحب غيرها و بتسيبه و تتجوز لحد اما يقتنع ان البنت الي بيدور عليها مش موجودة في مصر الا في بيوت الدعارة فهيروح يلاقي بييوت الدعارة نفسها فيها ام احمد و ام عيـــلاء و محاسن ام صدر فاتن .. وان البنات الصغيرة دي غاليه عليه  اوي و عمرها ما هتفكر في حب و كلام فاضي لانها بتكون نفسها و بتسعى على عقد عمل في دبي او البحرين عشان ترجع تفتح كبارية صغير على قدها .. فبينزوي في اوضته فوق السطوح بيحتضن زجاجة البراندي و يقف على سور السطوح  بعد ان يكتمل سكره يهتف في جموع المصرين ( ياااااا مصريــــــــــــــن , طيزكوو حمراااء)  و بعد كدة تجيله هسترية ضحك و بعدها ينام ..

صفات الشخص الغير مستقر : 

• هتلاقيه بيقول لا كتير , لانه مش باكي على حاجة مش خايف من حاجة , بيقول لا و بصوت عالي احياناً 
• هتلاقي في علاقة وطيدة بينه و بين الشرطة او بمعنى اصح تخشيبه الشرطة لانه بيكون زبون مكان .. كثير المشاكل مع المجتمع او الفاسدين فيه او نخليها المجتمع مهي هي ,, و مبيعمرش في شغلانه و لو عمر مبيعرفش يمشي اموره و يقول لمديرة احنا بنتعلم منك يا فندم , بل احياناً بيمشي لانه بيقوله حضرتك حمار يا فندم 
• ان ملقتهوش زمالكاوي فهتلقيه اهلاوي بس بيفهم كورة او هتلاقيه مش كروي من اساسه 
• هتلاقيه ليه علاقة بالسياسة ياما ناشط اوووي ياما على اقل تقدير مبيعرفش يقفل بوقة عالقهوه 
• ناس كتير بتفتكره ملحد و ساعات فعلا بيكون ملحد و ساعات تلاقيه قاعد في الحسين بيعيط و نايم جنب الدراويش على الارض بعد صلاة الفجر .. متعرفلوش
• بيحب السكس و نفسه يكون في الحلال بس مقتنع ان الحلال بقى غالي اوي  , بيحب الخمرة و عارف انها غلط و حرام و الحشيش  عنده في حرمانية الخمرة بس مستحب مع الخمرة جداً , بيحب يصلي , بيحب صحابة و بيحب اهله و لو انه على خلاف دائم معاهم .. 

انتهى الجانب الكوميدي في التدوينة و نبدأ الجانب التراجيدي ..

فلاش باك اثناء الموت .. 

المستقر :

 اثناء سكرات الموت  و هو في ال 50 او ال 60 من عمرة على سريرة في شقته التمليك بالبجامة الكستور , عياله ملمومين حواليه بيعيطو على فراق ابوهم .. لكن هو باصص لابنه و شايل همه انه معرفش يجبله شقه قبل ما يموت , معرفش يجبله واسطه تشغله بدل ماهو مرمي عالقهوة .. يبص لبنته الي ملحقش يكمل جهازها و متمرمطة في الشغل عشان تكمل هي جهازها بنفسها , يبص لمراته عشرة عمرة يفكر هتشيل البيت ازاي بالمعاش الي ميأكلش عيش عاف , يجي يفتكر حياته يلاقي مفيش !!! الشريط فاضي يا استاذ ؟؟ يدوس ستوب بلاي يلاقي مفيش !! راحو فين ال 50 سنة !! طب مفيش فسحة كدة لتركيا ولا حتى لمارينا ؟؟ مفيش غير سفرية شارع خالد ابن الوليد في شهر العسل 4 ايام و الخامس كنت في الشغل .. طب ازاي  فين الحلو ؟؟ لقطات من الشريط اول ايام جوازه , يوم ما ربنا رزقة باولاده  , اول بنت حبها من طرف واحد واتكسف يقولها بس يبص لمراته يحاول ينسى بسرعة عشان متقفشوش و هو بيموت .. اما عن السواد ففاكره كانه امباااارح .. إقنع نفسك يا عمي انه زهايمر , موت و ارتاح و متقلقش على  الي عايشين لو عاشو زيك فهم هيموتو زيك نفس الموتة و نفس الفلاش باك . بس يا شيخ امانه عليك افرد بوزك ونت بتموت 

الغير مستقر : 

لو جاتله سكرات الموت فهو غالباً بيكون فاكر نفسه في حلم  او بيأفور , بيكون في الاربعينات من عمره على سريرة او عالقهوة و لو على سريرة فاوضته بتكون فوق سطوح بيت في وسط البلد او عابدين , نايم بالفانلة الحملات و جنبة طفاية السجاير عاملة زي المترو الساعة 4 العصر من كتر اعقاب السجاير الي بتتحرش ببعض , ان ما كانش تعبان و عارف ان وقته قرب فبيحس انها النهاية , مبيكونش في حد جنبة يبكي عليه , مبيكونش في حد بيمسك ايده ويطبطب عليه , بيموت وحيد .. تفتكر حد هيبكي عليك ؟ تفتكر اصلاً حد هيفتكرك ! و لو افتكر تفتكر هتكونلك جنازة زي جنازات موظفين الحكومة ولا حتى زوجة تتشحتف عليك ونت بتنزل الطربة و بنت يغم عليها و انت بيغطوك بالتراب  و ابن يفك الكفن من على وشك جوة الطربة  .. دي موته دي يا جدع !! دنت مش بعيد ينسوك  في اوضتك لحد اما ريحتك تتطلع , طب ليك طربة ولا هتدفن مع مدافن الصدقة ؟ طب خلي بطاقتك جنبك عشان يطلعولك شهادة وفاة او يكتبو اسمك عالتربة .. 

خلينا في الفلاش باك , مبتسم  ممممم !! معظم الشريط كله قفشات كوميدية او ليالي رومانسية  او سهرات على قهاوي المحروسة, بنت الجيران الي بوستها و ابوها قفشك و ضربك على قفاك و ابوك ضربك بالخرطوم اما عرف , اول بنت حبتها و مسكت اديها و عيطت ازاي لما اتخطبت لغيرك , مديرك في الشغل الي قلتله انت معرص و رفدك , طب فاكر زمايل الزنزانه و انت معتقل في سياسة و هم كلهم جنائين و كنت بترسم عليهم انك جيفارا مصر , اما صليت في اوضتك اول ماخرجت من المعتقل وقعدت تعيط  , يجيلك ملاك الموت ونت مبتسم , يستغرب ! دنت ياخي ماركعتش منها الا القليل اوووي بس يلاقك بتضحكله !!

اختار يابن آدم .. تعيش ازاي و تموت ازاي ..