للاسف الموقف الوحيد الي بتعاطف مع العساكر او بيصعبو عليا و بشفق عليهم - للاسف دي عاطفة انسانية غير ارادية - لما بكون في الاستاد و يعد جنبي عسكري منهم غلبان ولا شوية قاعدين جنب بعض بيتكلمو كلام ( يبدو انه عربي بس يصعب فهمه ) ,
* وشه مبتسم و هو اتعس خلق الله بس هو وشة الي شكله كدة ,
* بيصقف علشان عايز يفرح و هو غالبا مبيكونش عارف مين الي بيلعب بس عاجبة جو التصقيف و التطبيل و نفسه يفرح ,
* عينه تحسها تايها مش عارفة اية الي بيحصل حواليها و مين الناس دول !! الشباب الي مطول شعرة زي البنات و البنات الي واقفة بتتنطط و تشجع زي الشباب و الموبيلات الي شكلها مش صيني دي و اختراع مربع كدة شوية يتفرجو فيه و شوية يتكلمو منه و بيقولو عليه اي باد !!
* لما بيشوفو الدخلة او الشماريخ بيبقو حاسين كانهم شافو سيدنا موسى بيشق البحر و بيعدي وسطة ؛ حالة من الازبهلال متحصلش الا لما حد يشوف معجزة قدامه
* لما ظابط يعدي او امين شرطة معفن تلاقيه خاف منه و كش و اتعدل في قعدته - ان متنفضش و قام ادي التحية - كانه شاف نبي ماشي على الارض ممكن يصخطه صرصار !!
* اما عنيك تيجي في عنية تلاقي علطول بيحاول يبص النحية التانية او يتوهه علشان متحسش انه كان متنحلك
انا بستحرم ان دول يبقو اداه في ايد ولاد الوسخة , بستحرم انكو تبقو انتو الايد الي بيبطشو بيها و يقمعونا و يقتلونا بيكو , بستحرم لانكو دايما بتبقو الضحية و الضربة بتيجي فيكو انتو و الكبار لما بيعوزو يقدمو ضحية بيقدموكو انتو , بستحرم علشان انتو بني ادمين بس للاسف ظباطكو عايزنكو تفضلو حيوانات كدة علطول علشان يعرفو يشرسوكو و يطلقكو على الي يضايقوهم ...
اتقو الله في انفسكم و ادونا فرصة نحاول نعملكو اعادة تأهيل و نعمل لنفسنا معاكو اعادة تأهيل و مصالحة , نحاول نعدل المايلة الي بقالها قرووون مايلة
No comments:
Post a Comment