لازم ندفع التمن

ايوة لازم ندفع تمن تخاذُولنا و خوفنا و رِضانا بسياسة الامر الواقع لما مبارك تخلى  عن  سلطاته للمجلس العسكري ,, خوفنا من دبابته و حبينا نلبسة طاقية الجيش و الشعب ايد واحدة !؟!  جايز ,, صدقنا بجد انه وقف في صفنا !! جايز بردو ,, صدقنا انه هينفذ كل مطالب الثورة و مصر الجميلة المدنية الحديثة الي بنحلم بيها ؟!! ممكن .. انا رأي يتلخص في المثل الشعبي الغريق بيتعلق بقشاية , 

وعلشان صدقناه كل دة لازم ندفع الثمن .. علشان وثقنا في مجلس هو مجرد ترس صغير في منظومة فساد كبيرة كانت حاكمة البلد و لازالت تحكمها عن طريق مجلسها العسكري الموقر ,, كان لازم ندفع التمن , و التمن المرة دي كان غاااااالي اوووووووي

كان دم ولادنا على ارض الميدان

كان تعرية بناتنا ببياداة العسكر

كان حالة فُرقة و شتات بين صفوف الثوار

كان المواطنين الشرفاء الي بيندسو وسطينا و يخطفونا و يعذبونا او يشوهو صورتنا في الشارع

كان اعلام فاسد استمر يبث سمومة وسطينا و جوة بيوتنا و شوهه صورة اي حد وقف جنب الثورة

كان حالة من التخبط المقصودة من المجلس سواء بإستفتاء مارس او بخطوات - المفترض انها إنتقالية لكن هي إنتقامية - غريبة و متشابكة 

كان حالة من العقاب الجماعي للشعب برفع الاسعار و أزمة أنابيب و  إنفلات أمنى مقصود علشان يكرهو اليوم الي قامت فية قُومتنا

كان سجن 12000 سجين في السجون الحربية من سُجناء رأي و نشطاء و ناس غلابة

كان طرد كل اعلامي حر نزيهه و قف مع الثوار من البرنامج بتاعه 

سنة و زيادة بندفع في التمن من دمنا و شرفنا و سمعتنا , من شغلنا و صحتنا و عافيتنا ,  من حريتنا ,,, كفايـــــــــــــة .. التمن إندفع و  زيادة ,, دفعنا تمن غبائنا او حسن نيتنا او غلطتنا - سموها زي متسموها - المهم اننا دفعنا تمن تركنا الميدان يوم 11 فبراير .. و مش مستعدين ندفع تاني خلااااااااااص

البلد دي لازم  تبقى البلد الي كنا بنحلم بيها في ال18 يوم .. اة هتبقى مدنية غصب عنكو .. وشعبها هيبقى حر ,, هيبقى في عدالة أجتماعية و هنبقى كلنا متساوين .. هنعيش بكرامة و شرف و مش هناخد على قفانا تاني من اي بدلة  ظابط سواء داخلية او حربية او  جن ازرق ... التمن اندفع ولازم بقى تدّونا بلدنا الي دفعنا تمن  حريتها من دمنا و حريتنا ... 

الي يخون الثورة ملوش مكان بننا  .. و الي باع الثورة علشان خاطر كرسي ,, هنشيله هو و الكرسي و نرمية برة .. الي قتلنا لازم يتحاكم - وهو معروف و مش محتاج تحقيقات - الي قعدونا سنة و نص في غلب و قرف و جوعو شعب كامل  لازم يتحاكمو .. كل واحد  اتهم الثوار في شرفهم لازم يتحاكم و يتحاسب ,, كل واحد وقف قدام الثورة لازم يتحاكم و يتحاسب 

مش هنرجع لورا , و لو مات منا ألف او  ألفين ,, مستعدين يموت مننا مليون و  أتنين بس دمنا والله مش هيروح هدر و هنوصل يعني هنوصل و كل واحد ساهم في قتلنا مش هنسيبه و هنقتص منه بالعدل ,, تحيا مصر ,, تحيا الثورة و الموت للخونة